विशेष साधारण सभा सम्पन्न

विशेष साधारण सभा सम्पन्न

विशेष साधारण सभा सम्पन्न

नेपाल घरेलु तथा साना उद्योग महासंघको विधान संशोधन गर्ने उद्देश्यले चितवनको सौराहामा विशेष साधारण सभा सम्पन्न भएको छ । विशेष साधारण सभामा ५१ जिल्लाको सहभागीता रहेको थियो । अविरल वर्षाले बाटो अवरोध भएका कारण साधारण सभाका लागि आएका केही जिल्लाका अध्यक्षहरु बाटोबाटै फर्किनु परेको थियो । यस विशेष साधारण सभामा उपस्थित सहभागीहरुको सुझाव बमोजिम विधानलाई संशोधन गरि सम्बन्धित निकायबाट स्वीकृत लिई लागु गर्ने जानकारी हुन आएको छ ।
एक दिने विशेष साधारण सभाको उदघाटन महासंघका अध्यक्ष श्याम प्रसाद गिरीले गर्नुभएको थियो भने बिशिष्ट अतिथिको रुपमा रत्ननगर नगरपालिकाका मेयर नारायण वनको उपस्थिति रहेको थियो । कार्यक्रममा मेयर वनले रत्ननगर नगरपालिकाले लघु, घरेलु तथा साना उद्योगको विकासका लागि औद्योगिक ग्राम स्थापना गर्न ७ विघा जमिन व्यवस्थापन गरिएको बताउनु भयो । उदघाटन सत्रमा यसअघि महासंघका बरिष्ठ उपाध्यक्ष उमेश प्रसाद सिंहले स्वागत मन्तव्य दिनु भएको थियो । समारोहमा निवर्तमान अध्यक्ष सुरेश प्रधानले मन्तव्य दिनु भएको थियो भने धन्यवाद ज्ञापन केन्द्रीय महिला उद्यमी समितिका अध्यक्ष शिवा उपाध्याय अन्जुले गर्नु भएको थियो । कार्यक्रम संचालन महासचिव डम्वर प्रसाद रेग्मीले गर्नु भएको थियो ।
उदघाटन पश्चातको बन्द सत्रमा महासंचिव डम्वर प्रसाद रेग्मीले महासंघको गतिविधिका बारेमा, कोषाध्यक्ष सत्यनारायण प्रजापतिले आर्थिक अवस्थाका बारेमा र केन्द्रीय महिला उद्यमी समितिका महासचिव शान्ता बास्कोटा कोइरालाले महिला उद्यमी समितिको गतिविधिका बारेमा संक्षिप्त जानकारी गराउनु भएको थियो । यसपछि उपाध्यक्ष तथा विधान संशोधन मस्यौदा समितिका संयोजक सूर्य वहादुर कंडेलले विधान संशोधनको मस्यौदा छलफलका लागि प्रस्तुत गर्नुभयो । छलफलका लागि प्रस्तुत मस्यौदा माथि सुझाव संकलन कानूनी सल्लाहकार अधिवक्ता शान्तिराम खतिवडाले गर्नुभएको थियो । मस्यौदामा उठेका जिज्ञासाहरुको जवाफ अध्यक्ष श्याम प्रसाद गिरी र मस्यौदाका संयोजक तथा उपाध्यक्ष सूर्य वहादुर कडेलले दिनु भएको थियो । जिज्ञासाहरुको चित्तबुझदो जवाफ पछि सहभागीहरुबाट प्राप्त सुझावलाई समेत.ध्यानमा राख्दै विधान संशोधन गरिने बताउँदै अध्यक्ष गिरीले विशेष साधारण सभा सम्पन्न गर्नु भएको थियो । विशेष साधारण सभाका क्रममा महासंघको जिल्ला संघ भक्तपुर घरेलु तथा साना उद्योग संघ र बाँके जिल्लास्थित महासंघको कोहलपुर नगर समितिले कार्यालय भवन बनाएको र पाँचथर जिल्लाले भवन निर्माणका लागि जग्गा प्राप्त गरेको जानकारी गराइएको थियो ।